Звезда го декласираше Будуќност и се пласираше во АБА финалето

Црвена Звезда покажа дека е неколку класи подобар тим од Будуќност и на прелесен начин се пласираше во финалето во АБА лигата, откако разликата во квалитет дојде до израз и на гостувањето.

По убедливата победа на домашен терен, „црвено-белите“ очекуваа да наидат на доста посериозен отпор кај Будуќност, но мечот во Морача беше максимално едносмерен, со исклучок на првата четвртина.

Будуќност имаше сила само за 10 минути и го доби овој период со 26:25, но после тоа следеше голем пад во играта, а уште во втората четвртина стана јасно што ќе следи во продолжение.

Звезда направи пресврт откако ја доби втората четвртина со 23:8, а победата беше потврдена во третата во која резултатот гласеше 29:11.

Последните 10 минути беа само рутина, но фаворитот продолжи да „меле“ и на крајот запиша преубедлива победа од 97:56 за 2:0 во серијата и пласман во финалето во АБА лигата.

Во второто полуфинале, Партизан ќе ги одмери силите со Цедевита Олимпија.