Жезус откри каков план има за Алиоски и го одложи планираното деби за Фенербахче

Езџан Алиоски денеска го одработи првиот тренинг со своите нови соиграчи во Фенербахче, но и со новиот тренер чии инструкции ќе треба да ги слуша во новата натперварувачка сезона.

Жорге Жезус е искусен и трофеен стручњак од кого може многу да се научи, па водејќи се по своите јасни методи, Португалецот денеска на турските новинари им открил дека ќе почека извесно време, пред да му даде шанса на македонскиот репрезентативец.

Фенербахче утре игра натпревар против Словачко во квалификациите за Лигата на Европа, средба од која сепак нема да биде дел големото летно засилување.

– Алиоски само што се приклучи на тимот. Сè уште не е физички подготвен. Тој нема да игра на натпреварот со Словачка, – им порачал Жезус на новинарите.

– Тој е во фаза кога треба да се развива преку тренинзи во пресезоната и нема да биде веднаш во комбинација за игра. Од играчите кои последно дојдоа, Густаво Енрике е најподготвен за настап, – изјавил Португалецот.