Зарко ја прекина доминацијата на Маркез во Германија, квалификациите најавија супер возбудлива трка

Марк Маркез немаше загубено во едни квалификации на Захсенринг уште од времето кога се натпреваруваше во помалите категории во 2009-та година, се до денеска кога Жоан Зарко беше подобар од фаворитите и се избори за стартно место на омилената трка на осумкратниот светски шампион.

Маркез беше добар во текот на сите тренинзи, но на крајот мораше да се задоволи само со петто место, иако разликата е навистина минимална и е најава за супер интересна трка утре попладне.

Зарко успеа да ја прекине страшната доминација на Маркез на трката за Големата награда на Германија кога се во прашање квалификациите, но исто така го спречи и Квартараро да стигне до шеста поп-позиција во низа од стартот на сезоната.

Повозрасниот Французин беше подобар од својот сонародник кој ќе стартува втор, а во првиот ред ќе го видиме и Алеши Еспаргаро кој беше фантастичен со својата Априлија.

Џек Милер ќе стартува пред Марк Маркез на четвртото место, вториот ред го комплетира Оливеира, а меѓу првите десет се најдоа уште Марти, Пол Еспаргаро, Накагами и Бањаја.