Врачени наградите „8 септември“ за достигнувања во спортот

„Овие награди значат огромна чест, но и огромна одговорност, да ги носите со гордост и со достоинство и да бидете достојни претставници на македонското општество“,- ова им го порача министерот за спорт, Борко Ристовски, на добитниците на наградите „8 Септември“ за постигнувања во спортот, при свеченоста за доделување на наградите во Собранието.

– Чест и задоволство ми е што ги доделуваме овие награди за посебни спортски достигнувања на овој голем и значаен празник. Би сакал да порачам ова да биде само еден поттик следната година да имаме уште повеќе пријавени, ние како држава и министерство да имаме уште повеќе награди да доделуваме. Како министерство секогаш ќе бидеме на страна на спортистите и спортските работници. Овие награди кои ги добивате се огромна чест, но и огромна одговорност, да ги носите со гордост и со достоинство и да бидете достојни претставници на македонското општество кое врз база на вашите дејствувања ќе гледа во вас идоли. Мора да градиме вистински вредности по кои што ќе се водат младите,– истакна Ристовски.

Добитник на овогодинешната награда „8 Септември“ за животно дело е Борче Костовски, спортскиот работник, тренер и претседател на Таеквондо федерацијата на Македонија. Најголемиот успех Костовски го постигна како тренер на олимпиецот Дејан Георгиевски, кој го освои сребрениот медал на Олимписките игри во Токио во 2021 година.

– Ништо не е невозможно за тој што ќе се осмели. Ние се осмеливме. Една мала група на одбрани се осмеливме да направиме чекор, од Скопје до Токио, чекор кој трае седум години. Се осмеливме да освоиме олимписка норма, се осмеливме да ги погледнеме најсилните противници во нашиот спорт во очи и да ги победиме. Се осмеливме да стигнеме во олимписко финале на олимписки игри. Сето тоа резултираше со сребрен медал и со поставување на нашето знаме на олимпискиот пиедестал,– истакна Костовски.

Признанија за остварувања во областа на спортот денеска им беа доделени и на Мирко Димчевски, Рамадан Шабани, и Димитар Јованов од борење, како и на стрелецот на првиот гол за македонската фудбалска репрезентација, Зоран Бошковски.