Винисиус му се закануваше на Столе на теренот, Димитриевски му одговори како голем џентлмен по ремито (Видео)

Столе Димитриевски беше непробивлив ѕид пред голот на Рајо Валјекано и успеа да ги фрустрира големите ѕвези на Реал Мадрид, а особено тоа важи за Винисиус Жуниор кој имаше и тензичен момент со Македонецот во завршницата од мечот.

Голманот на Рајо Валјекано со своите добри одбрани ги неутрализираше големите фаворити, но во завршницата сакаше да украде и дел од времето и со тоа го навлече гневот кај Винисиус.

Уште во телевизискиот пренос се виде дека Бразилецот му намени неколку зборови на македонскиот чувар на мрежата, а угледните шпански емисии брзо го објавија видеото и ги открија точните зборови на Винисиус.

– Јас и ти ќе се видиме надвор….., – му се заканувал Винисиус на Столе, а Димитриевски изреагира како голем џентлмен и не даде преголема важност на овие зборови по ремито од 0:0.

– Тоа се работи кои се случуваат на теренот и нема ништо повеќе од тоа. Таков е фудбалот, тоа се нормални работи кога има тензија. Ми кажа дека ќе се видиме надвор, но ако го видам, ќе му дадам само една прегратка, – изјавил Димитриевски.