Вардар ја продолжи победничката серија, Металург го освои Охрид

Ракометарите на Вардар ја продолжија победничката серија и славеа над Прилеп со 41-24 во мечот од 8. коло од првата македонска лига.

„Црвено-црните“ одиграа рутински, двете полувремиња ги добија со тоа што далеку порасположени за игра беа во вторите 30 минути кои ги реализираа со 25-13. Во прв план беа крилата, па така Ѓукиќ со 7 голови беше најефикасен, додека пак по 6 дадоа Дибиров и Георгиевски.

Металург пак покажа ново лице и се избори за триумф кај секогаш незгодниот Охрид со 29-24. Пресуден беше првиот дел во кој скопскиот тим го спушти домаќинот на само шест голови (12-6) и со тоа си го отвори патот до третиот сезонски триумф.

На преостанатите две средби Струга и Еурофарм Пелистер 2 одиграа без победни 30-30, додека Пролет го надигра Радовиш со 27-21.