„Тутоспорт“: Фонсека веќе е под сериозен притисок, Милан размислува на сензационален наследник

Пауло Фонсека не стартуваше онака какошто замислуваше во италијанскиот фудбал, без разлика на тоа што неговиот Милан остави навистина добар впечаток за време на подготвителниот период во САД.

Офанзивниот фудбал кој го негува Португалецот ги импресионираше и неутралните фудбалски фанови, но во клуб со големина каква што има Милан, на прво место секогаш се ставаат резултатите и освоените бодови во домашното првенство.

Фонсека стартуваше со разочарувачко реми на домашен терен и со пораз од Парма изминатиов викенд, а бидејќи сега следи период во кој „росонерите“ ќе играат против Лацио, Интер и Фиорентина, медиумите почнаа дополнително да вршат притисок врз работата на новиот тренер.

„Тутоспорт“ информира дека засега Фонсека не е под сериозен ризик и ја има довербата од Златан Ибрахимовиќ, но ако не ги промени резултатите во наредните неколку кола, може да заработи и експресен отказ од раководството на клубот.

Весникот од Торино информира дека Португалецот веќе го чувствува притисокот и нема да му биде лесно во периодот во кој следи, но додава дека Милан веќе подготвил терен и за сензационална замена доколку дојде до најлошо сценарио.

Според информациите, Милан како клуб е подготвен да му даде нова шанса на Масимилијано Алегри, човек кој веќе еднаш го водеше великанот од „Сан Сиро“, но кој подоцна се етаблираше како врвен стручњак како предводник на Јувентус.