„Трета среќа“: Вардар назначи добро познато име за нов тренер (Фото)

Вардар остана без двајца тренери во неполн месец и се најде во ситуација да бара трет во краток временски интервал, откако Горан Петрески реши да преземе одговорност и да си поднесе неотповиклива оставка по поразот од Воска Спорт.

Претходно, со клубот се раздели и Гораз Михаилов кој го водеше првиот тим од средина на минатата сезона, па тоа ја натера новата управа експресно да бара ново решение во стручниот штаб.

Со цел што подобро да се запознае со тимот за време на двонеделната репрезентативна пауза, Вардар ја стартуваше седмицата со информација за новиот тренер, а тоа е Срѓан Захариевски.

Македонскиот клуб му посака топло добредојде на фудбалскиот работник кој е навистина ценет во нашата земја, па очигледно тој е предодреден да го „гаси пожарот“ во Вардар после лошиот старт на сезоната.

„Црвено-црните“ забележаа три порази во воведните четири рунди, со напомена дека примија по три гола во сите три меча.