Тен Хаг го прекина молкот и се огласи за неочекуваната одлука која ја донесе Јунајтед за Фергусон

Сер Алекс Фергусон остана без амбасадорската улога во Манчестер Јунајтед и беше тргнат од платниот список од страна Џим Ретклиф, одлука која предизвика лавина од реакции во јавноста и многу негативни коментари од легендарни фудбалери на самиот клуб.

Оваа драстична мерка беше окарактеризирана како максимално бесчувствителна кон човекот кој направи фудбалски великан од клубот од „Олд Трафорд“, па иако со тоа му се намалува и влијанието кое ќе го има врз тимот, Ерик Тен Хаг сега го прекина молкот и најави дека и во иднина ќе ги слуша советите од „шефот“.

– Без разлика на се, Фегусон и натаму ќе има влијание врз нас. Фергусон е Манчестер Јунајтед, тој го изгради клубот и го доведе до ова ниво и нормално е да има влијание врз нас.

– Сите ние знаеме што сака Сер Алекс, сака да види победнички Манчестер Јунајтед и сигурен сум дека и во иднина ќе ни остане достапен за совет.

– Ќе ни биде потребно тоа од него, на краток, но и на долг рок. Откако сум тука во изминативе две ипол години, секогаш било така и тоа нема да се промени. Еднаш во пола година имаме формална средба со него, во меѓувреме имаме и неформални средби за време на натпреварите. Секогаш го среќаваме и неговото влијание повторно ќе биде важно за нас. Во моментов не можеме да ги израмниме стандардите кои тој ги постави во овој клуб, но полека одиме кон тој пат, – изјави Тен Хаг.