Талески за „Дерби“: Ми годи интересот од Вардар!

Македонскиот ракометар, Филип Талески, откако го заврши настапот за германскиот бундеслигаш Балинген, стана цел на интерес на повеќе клубови.

Последно, тренерот на Вардар, Стевче Алушовски, откри дека му испратил понуда, додека низ медиумите претходно кружеше шпекулација дека можеби е баран и од Еурофарм Пелистер.

„Дерби“ го побара Талески за изјава и македонскиот ракометар ни излезе во пресрет.

– Стои тоа дека имам понуда од Вардар. Се е отворено! Мило ми е што ме бара еден клуб како Вардар кој е двократен европски првак. Останува да се види што ќе се случува периодов, па да се донесат одлуки. Сакам уште малку да почекам, така што навистина се е отворено,- ни изјави македонскиот репрезентативец.

Откако стана јасно дека ракометната Лига на шампиони нема да се доигра, а ЕХФ ги одреди четирите екипи учеснички на Ф4-турнирот поместен за декември, Вардар започна со реконструкција на тимот и најави преговори со многу имиња, меѓу кои официјално е и Филип Талески, кој претходно се развиваше во Металург, па замина во Рајн Некар, а од таму во Балинген.

На Европското првенство во Австрија, Талески имаше најбрз измерен шут од страна на официјалните лица, со брзина од 141 км/ч во дуелот со Чешка, што е една од претпоставките за негова еволуција во нов „бомбардер“ по нашиот легендарен капитен, Кирил Лазаров.