Слот откри дека има специјален план за Киеза пред дебито во ЛШ

Арне Слот искажа максимален респект за Милан пред денешната пресметка во Лигата на шампионите и нагласи дека многу го почитува седумкратниот европски шампион, кој вечерва ќе биде домаќин во првиот од многуте закажни спектакли во новиот формат во најелитното натпреварување.

Натпреварот на „Сан Сиро“ сигурно ќе даде одговор за реалната сила на двата тима во овој момент, а италијанските новинари посебно се интересираа и за тоа дали Федерико Киеза ќе добие шанса за игра.

Летното засилување за Ливерпул направи голема промена со трансферот од Јувентус во Ливерпул, но поради сите ризици кои ги носи еден таков чекор, Арне Слот најави дека ќе биде внимателен со крилниот напаѓач.

Холандскиот стручњак планира да го дозира Киеза и да го внесува во ритам чекор по чекор, па на некој начин им соопшти на новинарите да не го очекуваат во стартната постава вечерва во Милано.

– Ливерпул мора да носи квалитетни играчи и Федерико е еден од нив. Тој е комбинација од квалитет и добра работна етика, а тоа е културата на нашиот клуб. Може да донесе плус на неколку позиции во нападот.

– Сепак, не треба да се забрзува процесот кој мора да го мине. Тој е дел од тимот малку време и првпат е надвор од дома. Би било огромно изненадување да се најде во стартниот тим. Не треба да го очекувате во стартната постава, но може да добие минути ако ни затреба.

– Првпат е дел од тимот, имаше неколку тренинзи со нас и премногу е рано да игра 90 минути. Се надеваме дека ќе добие минутажа во натпреварите кои следат, тоа е нашиот план за него, – изјави Слот.

Холанѓанецот денеска ќе дебитира како менаџер на Ливерпул во Лигата на шампиони, а сигурно ќе има дополнителен мотив за победа по непријатното разочарување со Нотингем Форест и поразот од 0:1.