Шундовски: Нема тука да застанеме, работевме напорно за оваа победа!

Екипата на Еурофарм Пелистер конечно дојде до победа во Лигата на шампионите и тоа на гостувањето во Данска кај Фредерија каде славеше со резултат 25:23.

„Зелено-белите“ го загубија првиот дел со 12:9, но по паузата покажаа друго лице, одигра далеку поефикасно во нападот, направија пресврт и дојдоа до славје со кое му го препуштија „фенерот“ во групата А токму на противникот.

-Честитки до мојот тим за победата. Одигравме одлично, победивме квалитетна екипа. Ова не беше натпревар без грешки, особено ги имавме во првото полувреме, ама во тој период трипати се вративме од негатива од три гола.

-Во продолжението одигравме како тим, честитки уште еднаш до момците. Верувам дека овде нема да застанеме. Работевме напорно за да стигнеме до овој резултат. Ова беше важна победа за нас, историска во ЛШ, -истакна тренерот Звонко Шундовски.

Клучен играч во триумфот беше голманот Никола Митревски кој имаше дури 15 интервенции.

-Честитки за победата. Во првото полувреме не бевме на посакуваното ниво ама покажавме борба и бевме добри во транзиција. Во вториот дел заигравме многу подобро и така остана до самиот крај, -порача искусниот голман.