Шкупи се пофали со ангажман на искусен стопер од Словачка

Шкупи остана покус во шампионската трка оваа сезона и не беше блиску до одбрана на титулата, па по кратката пауза, клубот почна да работи со полна пареа и да прави планови за следната сезона.

Клубот од Чаир веќе го претстави Арби Воша и го најави како големо засилување, но сега чаирчани се пофалија и со ангажман на искусен стопер кој доаѓа од Словачка.

Шкупи се раздели со осум играчи по крајот на сезоната и јасно е дека ќе има мал ремонт во тимот, па по Воша, официјално со синиот дрес позираше и Михал Пинтер.

– Најпрво, сакам да нагласам дека сум многу среќен што ми се укажа можност да бидам дел од тимот на Шкупи. Многу сум среќен што дојдов тука и се надевам дкеа ќе бидам здрав и ќе можам да му помогнам на тимот.

– Не играв многу фудбал последните неколку месеци, многу ми недостасува топката и со нетрпение чекам да почнам. Едвај го чекам првиот тренинг и првиот натпревар, – изјави 29-годишниот Пинтер кој доаѓа од редовите на Злате Моравче.