Сане постигна мајсторски гол од слободен удар, Баерн броеше до седум на „Алијанц арена“ (Видео)

Неколку дена по импресивната претстава на „Камп Ноу“ во Барселона, Баерн Минхен продолжи онаму кадешто застана во Каталонија, или поточно, демонстрираше уште понемилосрдно издание во најновата бундес пресметка во Германија.

Баерн Минхен важеше за апсолутен фаворит против Бохум, а тоа го оправда на теренот такашто го испрати гостинот со седум „парчиња“ во својата мрежа од „Алијанц арена“.

Лерој Сане одговори фантастично на критиките и игра извонредно откако Нагелсман го смести на левата крилна позиција, па со денешниот мајсторски гол од слободен удар, дојде до учинот од пет погодоци и седум асистенции на последните осум меча кои ги одигра.

Крилниот фудбалер испрати неодбранлив удар од слободен и ја отвори серијата на Баерн, која потоа продолжи со погодоци на Кимих и Гнабри и автогол на Василис.

Баерн постигна уште четири гола во второто полувреме, но последниот на Милер беше поништен поради офсајд и конечниот резултат гласи 7:0. Во вторите 45 минути, Левандовски го постигна петтиот гол за домаќините, Кимих со втората реализација зголеми на 6:0, а Чупо Мотинг беше стрелец на последниот регуларен гол.