Рицоли го потврди новото правило кое се разгледувало во ФИФА: Од ФИФА ќе го дозволат тоа кога ќе продолжи сезоната

Еден од најдобрите поранешни фудбалски судии во Италија, Никола Рицоли потврди дека ФИФА планира да го дозволи правилото кое во последните неколку дена стана топ тема во фудбалската јавност.

Имено, Рицоли изјави дека се размислува да се овозможат пет замени за време на еден натпревар, наместо досегашнтие три.

Клубовите во краток период ќе мора да одиграат голем број на натпревари, па токму затоа од ФИФА ќе донесат одлука тренерите да имаат поголема можност да ротираат за време на натпреварите.

– Верувам дека ФИФА тежнее кон тоа да дозволи пет замени. Во фаза кога сезоната е со многу натпревари еден по друг, мора да преземеме заеднички мерки за да си помогнеме меѓусебно, -изјави Рицоли за „Скај Спортс Италија“.

Кога фудбалот ќе се врати ќе се следат строги медицински и хигиенски процедури, натпреварите ќе бидат играни зад затворени врати, а луѓето задолжени за натпреварот со сигурност ќе одржуваат социјална дистанца.

Се појавија информации дека се размислува и за кратење на полувремињата кои сега траат по 45 минути, но тоа веројатно нема да се случи, па натпреварите доколку продолжат ќе се играат во стандардните 90 минути.