Раниери со уникатна изјава го опиша величественото издание на Дибала

Пауло Дибала без конкуренција е најдобар и најквалитетен играч на Рома, а тоа го покажува на натпревари како оној вчера против Порто во Лигата на Европа.

Во моментите кога Рома прва прими гол и се чинеше дека има планина за искачување пред себе, аргентинскиот фудбалски мајстор ги презема работите под своја контрола и со два погодоци го однесе мечот во посакувам правец за домаќините, а неговото блескаво издание беше зачинето со уште неколку генијални додавања, како и извонредни технички потези.

Кога е здрав и фит, Дибала без никаков сомнеж е еден од најдобрите играчи во италијанскиот фудбал, а искусниот Клаудио Раниери со уникатна изјава се обиде да опише каков значење има „Ла Јоја“ за неговиот тим.

– Да имате големи играчи во тимот секогаш помага во комплицирани ситуации. Тоа што го имаме Дибала во нашиот арсенал на оружја значи многу. Не само што е добар играч, тој е извонреден лидер. Не зборува премногу, но кога го прави тоа, ги кажува правилните зборови.

– Благодарение на него се вративме во мечот, соиграчите дадоа се за него, но Дибала е светлината, Дибала е искрата, тој е бомбата на Рома. Тој е се што поседува оваа Рома. Во моментов е во одлична физичка кондиција, ужива во фудбалот и сака да биде само на теренот. Среќен сум што го имам крај себе, – изјави Раниери.