Рамос ги издвои двајцата свои најголеми идоли и ја изненади јавноста

Серхио Рамос се врати на фудбалските терени после долгата пауза, но по мечот со Сент Етјен, сега е приморан одново да мирува како последица на прекумерен замор на мускулот кој му правеше проблеми.

ПСЖ информира дека не станува збор за обнова на повредата и дека Шпанецот брзо ќе се врати во стројот, но пред да се случи тоа, искусниот стопер стана популарен со својата последна изјава која ја даде за „Амазон Прајм“.

Благодарение на своите технички квалитети, Рамос со години наназад важеше за еден од најдобрите дефанзивци во Европа, но верувале или не, кога станува збор за неговите идоли, не се работи за дефанзивци.

Серхио направи еден интересен избор и ја изненади јавноста, бидејќи за свои примери и идоли ги нагласи Клаудио Каниџа и Фернандо Редондо.

Првиот беше познат по својот тандем со Диего Армандо Марадона на почетокот на 90-те години на минатиот век, додека Редондо беше голема ѕвезда на Реал пред Серхио воопшто да заигра за „кралскиот клуб“.

– Имав двајца или тројца идоли, но двајца најголеми ми беа Клаудио Каниџа и Фернандо Редондо од Аргентина, – открива Рамос кој низ смеа додава дека единствена сличност со споменатите двајца му е тоа што носи долга коса како нив.