Ракитиќ знае која е најголемата сила на Рома: Тој е специјален, уникатен во секоја смисла

Севилја ќе игра во уште едно финале во Лига Европа, меч кој за нив има огромно значање затоа што ако слават во Будимпешта тие ќе се израдуваат на трофејот, но и ќе обезбедат место во Лигата на шампионите за наредната сезона.

Меѓутоа тоа воопшто нема да биде лесно затоа што на другата страна ќе биде Рома, тим кој веќе втора година во низа игра завршни средби во европските купови. Лани славеше во Конференциската лига на УЕФА, а сега е на еден чекор од пехарот во второто по ранг европско натпреварување.

Иван Ракитиќ е свесен дека пред нив е тешка мисија особено затоа што калчолигашот на клупата го има Жозе Мурињо кој е експерт за освојување на пехари во овие купови.

-Ќе биде уште потешко. Прво затоа што Рома е предводена од еден од најдобрите тренери на светот Жозе Мурињо, тренер во топ 3, ги има освоено сите европски купови во кариерата, а не само оние… Мурињо е вистински специјален стратег, уникатен, во секоја смисла, -порача Иван за „Тутоспорт“.

Финалето е закажано за 31 мај на „Пушкаш арена“.