Првиот човек на Спортинг испорача брутална закана до Ѓекереш и Арсенал

Виктор Ѓекереш ги договори личните услови со Арсенал и сака по секоја цена да го напушти Спортинг Лисабон, но од друга страна, португалскиот клуб не сака да навлезе во преговори со англискиот премиерлигаш и бара да биде исплатена откупната клаузула во целост.

Португалскиот шампион не попушта и бара да бидат исплатени до цент предвидените 69 милиони фунти, па доколку не се случи тоа во скоро време, Спортинг е подготвен да ја замрзне цела операција и да стави вето на трансферот.

Ѓекереш во меѓувреме бојкотира со штрајк и не се појави на предвидениот тренинг и покрај продолжениот одмор кој го доби, а откако неоправдано изостана од тимот на 12-ти јуни, Фредерико Варандас му се закани на фудбалерот, но и на Арсенал како клуб кој ги сака неговите услуги.

– Смирени сме во целата ситуација. На крајот, сето ова може да се заврши со завршен трансфер пазар, со голема казна за фудбалерот и со негово извинување до групата. Ако клубот кој преговара со него не сака да ја плати пазарната вредност која сметаме дека е фер, тогаш ќе немаме проблеми Виктор да остане со нас во наредните три години.

– Ако генијалците кои осмислуваат ваква трансфер стратегија сметаат дека со вршење притисок ќе го олесниме заминувањето, не само што грешат, туку целосно го отежнуваат процесот за заминување. Никој не е над интересите на клубот, без разлика за кого станува збор, – вели Варандас.