Првиот човек на Лече огорчен: Не го победивме Милан поради ѓаволска одлука на ВАР! (Видео)

Лече режираше страшен кам-бек и во период од четири минути израмни на 2:2 против Милан, но длабоко во судиското продолжение постигна гол и за 3:2 за победа.

Сите на стадионот се израдуваа на победничкиот гол на Пиколи, но на крајот Лече остана без посакуваната бајковита победа, бидејќи ситен контакт меѓу напаѓачот и неговиот чувар беше досуден како прекршок.

Играчите на Лече му се нафрлија на главниот судија Абисо и бараа објаснувања од него по последниот судиски свиреж, но револтот не го криеше и првиот човек на клубот, Стики Дамијани.

– Крајот на натпреварот беше бајковит, доживеавме момент на магија кој го изградивме со напорна работа, но на крајот се беше уништено од ѓаволска одлука и ѓаволска употреба на ВАР.

– Ова го имам кажано одамна. Ако се користи ВАР за да се гледа влакно на косата, тогаш тоа треба да се прави за сите исто. Начинот на кој се користи ВАР е ѓаволски. Никој од играчите на Милан не протестираше за голот, тоа беше минимален контакт, – изјавил Дамијани за „ДАЗН“.