Првиот човек на Ла Лига откри колку пари ќе загубат шпанските клубови поради коронавирусот

Претседателот на Ла Лига, Хавиер Тебас уште еднаш го посочи датумот кога посакува да се врати фудбалот во Шпанија, но и кога треба да започне следната натпреварувачка кампања 2020/2021.

-Со Божја волја ќе започнеме на 11 јуни. Да се надеваме дека Мадрид и Барселона ќе дојдат во втората фаза. Во Ла Лига работат повеќе од 130 луѓе, така што сè може да се стори, на нов начин: патување, организација, сè. Подготвени сме и најважен ќе биде денот кога ќе го завршиме натпреварувањето. Следната сезона ќе започне на 12 септември, -истакна Тебас.

Воедно тој обелодени дека шпанските клубови поради коронавирусот ќе загубат најмалку 700 милиони евра.

-Важно е катастрофата на пандемијата да не предизвика економска непогода после тоа. Ова е студија за да се види кој верува во спортската индустрија, а кој не. Ќе биде важно да се види кои се нашите сојузници.

-Враќањето не значи дека нема да изгубиме милиони. Нашите клубови ќе изгубат најмалку 700 милиони евра и тоа ќе треба да се надокнади. Во тој налет, ќе биде добро да се види кој верува во индустријата уште од самиот почеток, -порачува Тебас.