Пелистер го врати противникот во игра, па на потежок начин стигна до победа во АБА 2 лигата

Македонскиот претставник Пелистер отвори со победа во новата сезона во региоланата АБА2 лига, натпреварување кое според најавите почна со нов формат.

Битолчани во воведната рунда во групната фаза за противник г оимаа Широки Бријег, а во натпревар во кој тимот на Петровиќ доминираше во најголем дел, само падот во концентрацијата дозволи да се влезе во неизвесна завршница.

Пелистер контролираше и можеше многу порано да го реши прашањето околу победникот, но на крајот допушти да се влезе во трилер финиш во кој сепак домашните кошаркари имаа повеќе нерви.

„Зелено-белите“ триумфираа со 74:72 на отворањето на новата сезона и сосема заслужено ги освоија бодовите, иако победата можеше да биде и доста полесна.

На пет минути пред крајот, Пелистер имаше плус 13, но големото опуштање придонесе Широки Бријег да дојде до 67:66 и да се надева на голем пресврт. За среќа, избраниците на Петровиќ имаа челични нерви и успеаја да ја одржат предноста, па потешко од потребното стигнаа до првите бодови во сезоната.

Американецот Антоан со 16 поени беше најефикасен во победничкиот тим, Мишковиќ имаше дабл-дабл учинок од 13 поени и 11 скокови, а тие беа и единствените двајца со двоцифрен учинок.