Неверојатна вест од Англија: Јунајтед побарал бизарна услуга од Сити во подготовките за церемонијата во Париз

Манчестер Јунајтед имплетираше мерки за стопирање на непотребни трошоци, па покрај тоа што оваа пракса го остави без работа Сер Алекс Фергусон, соработниците на Сер Џим Ретклиф изминативе неколку дена побарале и бизарна услуга од лутиот ривал Манчестер Сити.

Како што јавува угледниот британски медиум „Дејли мејл“, Јунајтед во кратењето на трошоците сакал да го стави и излетот на двајца членови од првиот тим во Париз, па „ѓаволите“ се дрзнале да побараат услуга од Манчестер Сити.

Имено, Коби Маино и Алехандро Гарначо се повикани да бидат дел од церемонијата во Париз на која ќе биде доделена „Златната топка“, а бидејќи Сити веќе има резервирано приватен чартер лет за осумте номинации на свои фудбалери, Јунајтед побара од англискиот шампион да ги понесе со себе и своите двајца претставници.

„Дејли мејл“ обелоденува дека ваквото барање ги шокирале одговорните луѓе во Сити за логистика на важни фудбалски настани, а барањето било експресно одбиено бидејќи во малиот приватен авион немало место за Гарначо и Маино.

Свечената гала вечер ќе се одржи в понеделник во француската престолнина, па како што стојат работите, Јунајтед сепак ќе мора да плати приватен чартер лет за да им обезбеди сигурно пристигнување на своите ѕвезди во Париз.