Нерес направи „дар-мар“ во одбраната на Удинезе и предизвика бизарен автогол (Видео)

Наполи беше на добар пат да приреди второ разочарување во низа за своите навивачи, но сепак избраниците на Антонио Конте реагираа навреме и успеаја да го свртат мечот во Удине во своја корист.

Скромното прво полувреме во кое Удинезе поведе со голот на Тован секако не беше добар увертира за Конте, меѓутоа искусниот стручњак успеа да го извади најдоброто од своите фудбалери, и тоа уште во раната фаза на вториот дел.

Извонредниот пас на МекТомини заврши со лесен гол на Лукаку за 1:1, па од овој момент теренската иницијатива целосно се префрли пред голот на домаќините и Наполи беше тој кој се прашуваше за случувањата на теренот.

Во таква поставеност, Бразилецот Нерес имаше соло продор и направи „дар-мар“ во одбраната на Удинезе, а сето тоа резултираше со бизарен автогол на Џанети за 1:2.

Случувањата во 76-та минута му го донесоа потребниот мир на Конте, а ситуацијата беше уште подобра за него кога Ангиса зголеми на 1:3 и го постави конечниот резултат на оваа средба.

Наполи на овој начин им се врати на победите по поразот од Лацио, односно го одржа чекорот на Аталанта која повторно има плус два на табелата.

Головите погледнете ги ТУКА