Неочекуван трансфер на повидок, Стерлинг од јануари се сели во Ла Лига

Еден од фудбалерите со највисоки примања во Манчестер Сити, Рахим Стерлинг би можел да стави крај на авантурата во англискиот шампион и уште во јануари да реализира неочекуван трансфер.

Офанзивецот веќе извесен период нема зацементирано место во првиот тим на Пеп Гвардиола, па почнаа да се шират шпекулации околу неговата иднина на „Итихад“.

Последните најави кои доаѓаат од Шпанија говорат дека во јануари Стерлинг би можел да си оди од Манчестер и барем на привремен период да се пресели во Каталонија.

„Спорт“ пренесува дека од таборот на Барселона се сериозно заинтересирани да го ангажираат Стерлинг во јануари како позајмен фудбалер со право на целосен откуп на неговиот договор.

Стерлинг во минатите години се поврзуваше со трансфер во Реал Мадрид, но сега може да се пресели во најголемиот ривал на „кралевите“. Барселона има недостаток од квалитетни офанзивци по заминувањето на Лео Меси и Антоан Гризман, а како капак на се им дојде и потешката повреда на Мартин Брајтвајт кој ќе отсуствува подолг период.