Награда за човекот кој ги намести сите коцки во Аргентина: Скалони ќе ги води „гаучосите“ до 2026 година!

Аргентина бележи супер резултати во изминативе години откако на клупата седна Лионел Скалони, човекот кој на почетокот беше привремено решение, ама се покажа како топ погодок за федерацијата.

„Гаучосите“ во последните две пријателски средби ги совладаа Хондурас и Јамајка со што дојдоа до бројката од 35 мечеви без пораз (рекордот на Италија е 37), претходно станаа и шампиони на Јужна Америка, а за ова голема заслуга има Скалони кој заслужено доби нов договор според кој ќе остане на сегашното место до 2026 година.

-Со гордост можам да објавам дека постигнавме договорот за продолжување на соработката со Лионел Скалони до Светското првенство 2026 година, -објави првиот човек на аргентинскиот фудбал Чики Тапија.

Следен предизвик за Скалони е да го подготви тимот за мундијалот во Катар каде некогашниот светскиот шампион во групната фаза ќе ги одмери силите со Саудиска Арабија, Мексико и Полска.