Надал накратко образложи зошто Ѓоковиќ никогаш нема да биде сакан како Рожер и Рафа

Тони Надал го посочи Новак Ѓоковиќ како најкомплетен тенисер во овој момент и не штедеше комплименти за играта на десеткратниот шампион на Аустралијан Опен, но чичкото и поранешен тренер на Рафа се обиде да објасни зошто Србинот никогаш нема да ја добие љубовта која ја добиваа Федерер и неговиот внук.

Надал како тениски тренер и експерт стана познат и со своите колумни за „Ел Паис“, но покрај тоа што се задржа на играчките квалитети на Србинот, се обиде да објасни зошто Ноле никогаш нема да биде сакан како Рафа и Рожер и покрај сите големи успеси.

Ѓоковиќ во неделата стигна до својата 10-та титула во Мелбурн и покажа дека е непобедлив во финалињата на „Род Лејвер“, но и натаму има такви кои сметаат дека Србинот не ја добива почитта која ја заслужува.

– Според мене, главниот проблем за Новак е што се појави во време во кое веќе имаше воспоставено големо ривалство меѓу Федерер и Надал. Луѓето и фановите ги сакаа нивните дуели, а Ноле беше ново момче од улица кое им ја расипа забавата. Исто така, неговото однесување на теренот знае да биде проблематично и тоа се причините поради кои никогаш нема да биде сакан како Рожер и Рафа.

– Како и да е, за мене Новак е голем шампион и секогаш сум имал добар однос со него, – завршува Тони Надал.