Мукаетов се премисли и донесе важна одлука: Политиката треба да се држи подалеку од спортот!

Живко Мукаетов најави свое повлекување од раководната функција како претседател на Ракометната Федерација на Македонија на почетокот на оваа година, но првиот човек денеска откри дека се премислил во изминатите три месеци и решил во најмала рака да го доврши новиот мандат кој му почна минатата година.

Мукаетов потврди дека ќе остане претседател на РФМ и во наредните три години, особено по последните добри резултати на најсилниот тим, но и одговорнсота која си ја зема да организира Европско првенство.

– Знаете дека најавив мое евентуално повлекување од позицијата претседател на РФМ. Видете, девет години не се мал период, од 2013-та година минаа многу денови, многу моменти минавме заедно. Благодарност за цела соработка, минавме лоши и добри моменти, имаше и разочарувања како тоа што не се пласиравме на Олимпијадата, – изјави Мукаетов во воведот кој изгледаше како разделба, но кој доби свој пресврт.

– Сепак, сметам дека не е вистинско време за повлекување од функцијата, особено после сите настани во последните неколку месеци, енергијата која ја добивме со овој тим. Имаме и важни обврски, Европското првенство кое се намачивме да го добиеме, како и Кадетското Светско првенство. Не е време за повлекување, решив дека не е добро да си одам после девет години и да се повлечам откако добив нов мандат.

– Инаку, и натаму стојам зад моето мислење. Во овој Управен Одбор има луѓе кои се способни да ја водат Федерацијата, но знаеме дека има и мераклии од страна кои сакаат да бидат претседатели. Политиката треба да се држи подалекиу од спортот. Во оваа прилика, сакам да порачам дека продолжуваме заедно да се носиме со сите предизвици, да градиме подобри резултати за македонскиот ракомет, – изјави Мукаетов на денешната седница на Управниот одбор.