Македонија со лоши пет минути го прокоцка одличното прво полувреме, па претрпе втор пораз од Египет

Македонската ракометна репрезентација го претрпе и вториот пораз на закажаниот двомеч со Египет, селекција која ја оправда фавортиската улога на двата подготвителни меча кои се одиграа во Каиро.

Селекторот Кирил Лазаров добро можеше да види каде треба да работи во наредниот период во кој ќе се подготвуваме за Европското првенство, на кое треба да бидеме подготвени токму за противници како Египет.

„Фараоните“ се селекција од прв ранг и Лазаров самиот нагласи дека ги избрал нив поради силината и широкиот ростер, па сега на селекторот ќе му биде полесно да ги види недостатоците и да ги коригира во наредните два месеци.

Македонија одлично се држеше во првото полувреме и водеше со 11:13, но потоа во завршните пет минути од првиот дел не постигна гол, што резултираше со пет гола во низа за домаќинот за 16:13.

Нашите избраници намалија на 16:15 на стартот на вториот дел, но тоа беше најблиску што стигнавме во вториот дел, во кој Египет на крајот рутински стигна до победа од 31:26.

Талески со девет постигнати гола беше најрасположен за игра во нашиот тим, додека пет реализации имаше Кузманоски.