Лоши вести од Загреб: Првичните прогнози се погрешни, повредата на Адеми е сериозна

Аријан Адеми незгодно се повреди по еден непријатен и несреќен дуел кој го имаше со Каи Хаверц, а иако првичните прогнози не беа загрижувачки, деталните прегледи направени во Загреб донесоа комплетно спротивно сценарио.

Неуморниот играч за врска и капитен на Динамо заработил потешка повреда на зглобот и ќе мора да паузира најмалку два месеци, поради што угледните медиуми од Загреб и Хрватска, го отпишаа Адеми од терените до пролетниот дел од сезоната.

Медиумите блиски до клубот откриваат дека прогнозите не се воопшто добри, па само чудо и неверојатно брза рехабилитација може да го врати Аријан на терените пред зимската пауза која е стандардна во фудбалска Хрватска.

Ова значи дека Динамо ќе игра без својот капитен на клучните натпервари во Европа кои следат до крајот на оваа година, а вестите се лоши и за македонската репрезентација.

Македонија е сосема поинаков тим со Адеми и без него во тимот, па сега Милевски ќе мора да бара решенија и алтернативи за средниот ред, бидејќи тој нема да стои на располагање за последните два меча против Ерменија и Исланд во квалификациите за Светското првенство.