Компани: Нојер се повреди за време на прославата на голот

Баерн Минхен му одржа фудбалска лекција на Баер Леверкузен во првото осминафинале во Лигата на шампиони, па сега на реваншот ќе брани голема предност за пласман во четвртфиналната фаза.

Баварскиот великан одигра далеку поискусно и ги искористи сите пропусти во одбраната на „фармацевтите“, па конечниот резултат можеше да биде и повисок од оние 3:0.

Чаби Алонсо како тренер на Леверкузен најави дека ниту на крај памет не му е да се откаже од оваа елиминациска рунда, а мотив плус за него и неговите фудбалери сигурно ќе биде и тоа што Баерн ќе го нема на располагање својот лидер и капитен, Мануел Нојер.

Искусниот чувар на мрежата одбрани еден зицер при резултат 1:0, но потоа по постигнатиот втор гол на Мусиала, побара замена поради повреда на листот.

Лекарските прегледи кои биле направени денеска потврдиле дека Нојер ќе паузира од три до четири седмици, што значи дека дефинитивно нема да го гледаме на голот на Баерн на реваншот за една недела.

– Реалноста е дека Ману се повреди додека го славеше вториот гол. За жал не можеше да го продолжи мечот и моравме да менуваме, – изјави Компани.