Ивановски не го заврши маратонот во Германија, тренерот Јакимовски тврди дека организаторот направил голем пропуст (Фото)

Дарио Ивановски е најуспешен македонски атлетичар во последно време на долгите делници и ги урна сите рекорди, па во ситуација кога секој нареден турнир брка да подобри свое лично време, денеска за жал пристигна и едно разочарување.

Македонскиот атлетичар беше нашиот претставник на познатиот маратон на европското атлетско првенство Минхен, Германија, но и еден од 17-мината учесници кои не ја завршија делницата од 42 километри.

Ивановски кој се врати од повреда издржал 25 километри пред да се откаже од настапот, кој според неговиот тренер Јакимовски бил осуден на пропаст поради големата утка на организаторот.

– После цели 20 месеци континуирано професионално настапување во атлетиката и успешно реализирани околу 40-тина меѓународни и домашни атлетски трки со неверојатни 17 рушења на национални рекорди дојде и до едно ДНФ. 31 година сум во атлетиката и ваков податок за врвен атлетичар во светски рамки навистина не сум забележал.

– Денес дури 17 атлетичари не го завршија маратонот во Минхен од 79 стартери. Неверојатен и недозволив пропуст на организаторот да во сред лето ја стави на програмата најтешката дисциплина со старт во 11.30 часот. За тоа и тие самите се свесни и кога тогаш ќе го признат пропустот. Сите светски маратони својот старт го темпираат пред 09.00 часот а тука утката е неверојатна и срамна. Дарио и покрај неодамнешната повреда, стартуваше подготвено и мотивирано за да ја победи на свој начин таа незгодна недела за заборав.
Самиот податок дека трчаше 25км на маратонот доволно кажува дека тој гинел до последен атом пред да застане во неподносливите услови.
Тој е голем и ќе се врати уште посилен. Тоа Ви го гарантираме лично јас и тој. Бидете горди што го имаме Дарио и следниот успех ќе се случи набргу.ГЛАВА ГОРЕ ДАРИО, – гласи пораката на Јакимовски.