Интересна изјава на Иванишевиќ: Му помогнав на Федерер да го освои светот

Горан Иванишевиќ како тренер се погрижи Новак Ѓоковиќ да ги надмине апсолутните рекорди на Рожер Федерер, но интересно е тоа што Хрватот ги фати почетоците на Швајцарецот во самиот залез на својата кариера.

Иванишевиќ двапати играше против Федерер во 2000-та и 2001-ва година, а популарниот „Зец“ има доста лоши спомени, бидејќи претрпе два порази на турнирите во Лондон и во Милано.

Разговарајќи за швајцарски „CH Media“, Иванишевиќ во интервјуто не можеше да избегне прашања за националниот херој во оваа земја, па Хрватот даде и интересна изјава за развојот кој го имал Федерер по победата во Милано.

– Шега на страна, беше чест и привилегија да се игра против Рожер Федерер. Мислам дека во Милано ме победи во четвртфиналето, знаете ли што се случи после тоа?

– Рожер ја освои првата титула во својата професионална кариера. Затоа секогаш велам дека му помогнав конечно да победи. Тоа ми звучи подобро, отколку дека сум претрпел пораз. После тоа, Федерер почна да го освојува светот, – вели Иванишевиќ.