Инѕаги по ремито на „Итихад“: Ќе беше подобро ако урнев еден друг рекорд на Сити

Симоне Инѕаги мора да биде задоволен од поставеноста и изданието на неговиот Интер против Манчестер Сити, но не и од некои реакции во самата завршница од акциите кои беа навистина стопроцентни.

Дармијан и Мхитаријан имаа големи шанси да го матираа Едерсон, но посебно се истакна грешката на дефанзивецот кој наместо да шутира, реши да ја враќа топката назад кога беше сам пред голот на домашниот тим.

Симоне Инѕаги посочи дека Интер не смее да им простува на противници како Сити и Реал Мадрид, па затоа и жали што не урна еден рекорд на англискиот тим кој датира веќе шест години.

– Потребна ни е луцидност во завршната третина од теренот, ова ни се случува и во Серија А. Мора да покажеме умешност и квалитет пред голот, знам дека го имаме тоа во тимот. Ова е прв меч на кој не постигнавме гол оваа сезона и мора да работиме на завршницата.

– Против тимови како Манчестер Сити и Реал Мадрид, мора да постигнете гол кога имате шанса, инаку после тие ќе ве казнат, – изјави Инѕаги, кој беше потсетен дека Интер е првиот тим кој не примил гол на „Итихад“ од 2022-ра година.

– Ќе бев позадоволен ако им го упропастев другиот рекорд. Знам дека тие се непоразени на домашен терен во Лигата на шампиони од 2018-та година, – изјави Инѕаги.