Ѓоковиќ ги извести фановите за својата здравствена состојба по поразот на Лејвер Купот

Новак Ѓоковиќ загуби од Феликс Оже Алијасим на последниот натпреварувачки ден на Лејвер Купот, а неговиот пораз беше најава за победата на тимот на светот, прва откако се одржува ова тениско натпреварување во последните пет години.

По вчерашниот брилијантен ден во кој победи во сингл и дубл конкуренција, Србинот денеска едноставно не беше на препознатливо ниво и мораше да му честита на подобриот ривал, а неговите фанови останаа загрижени од болните гримаси кои ги покажуваше, со јасен сигнал кон десниот зглоб на десната рака.

– Се мачам со десниот зглоб на раката во последните четири-пет дена. Го држев тоа под контрола, но двата меча во низа вчера очигледно имаа влијание. Денес не ми беше лесно, не можев да сервирам брзо и прецизно како што сакав и тоа се одрази на играта. Има влијание и тоа што не играв речиси три месеци, а сега одиграв три меча во помалку од 24 часа.

– Се надевам дека ќе ја средам ситуацијата до првиот меч во Израел и турнирот во Тел Авив. Ова не е истиот зглоб со кој имав проблем пред неколку години.

– Од друга страна, Феликс играше извонредно, сервираше екстремно добро и не сакам да му одземам заслуги за победата. Одигра извонредно цел меч, беше цврст и од основната линија и заслужено победи, – изјави Ѓоковиќ, кој го најави и својот календар до крајот на годината.

– Целта ми е да се пласирам на завршниот турнир во Торино. Следат Тел Авив, Астана и потоа ќе играм и во Париз во Берси. Се надевам дека ќе играм и во Торино. Тоа е првичниот план, може нешто и ќе се промени, – изјави Ноле.