Георгиевски и се обрати на цела македонската јавност пред заминувањето од Токио (Видео)

Неколку македонски спортисти допрва треба да настапат на Олимписките игри, но дел од македонскиот олимписки тим утре се враќа во главниот град откако заврши со своите обврски во Токио.

Без никаков сомнеж, утре во фокусот ќе биде сребреното момче со златен отсјај, фантастичниот Дејан Георгиевски кој вчера стана олимписки вицешампион во таеквондо.

Младиот 22-годишен Георгиевски и го донесе најсјајното одличје на Македонија од едни Олимписки игри по осамостојувањето, сето тоа заслуга на трите извонредни победи кои ги оствари на патот до големото финале.

Во период од неколку часа, цела македонска јавност се сплоти и му даде огромна поддршка на Георгиевски, а истата допре до него и од Токио. Пред заминувањето од јапонската престолинина, Георгиевски испрати порака преку таеквондо Федерацијата на Македонија.

– Голем поздрав до сите во Македонија. Ви благодарам за поддршката и енергијата која ми ја дававте на мене и мојот тим. Од ОИ во Токио доаѓам со сребрен медал со златен отсјај. Ве повикувам утре, четврток, заедно да го прославиме овој медал на плоштадот пред триумфалната порта во 19:30 минути. Ве очекувам во што поголем број, со цело срце за Македонија, – порача Георгиевски.