Ферстапен водеше 60 круга, но фантастичната стратегија на Мерцедес му донесе победа на Хамилтон

Макс Ферстапен го направи тоа што го посакуваше и го мина Луис Хамилтон уште на стартот, но иако ја водеше трката за Големата награда на Шпанија цели 60 круга, на крајот мораше да гледа како актуелниот првак лесно го минува со неговиот болид.

Ред Бул се одлучи за ризична стратегија со едно влегување во бокс, додека Хамилтон на 23 круга пред крајот, ги стави најмеките гуми и успеа да надокнади многу висока негатива во однос на Холанѓанецот, кој на крајот немаше никакви сили да се брани од нападот на Британецот.

Светскиот првак имаше заостанување од 23 секунди на 23 круга пред крајот, но откако излезе од вториот пит-стоп, едноставно „леташе“ по патеката во Барселона и на шест круга пред крајот едноставно го мина својот главен ривал за титулата. Во очајничките обиди да имаат барем најбрзо време, Ферстапен влезе по вторпат во боксот откако беше престигнат, па лошата стратегија му донесе само утешно најбрзо време кое му носи дополнителен бод.

Дефинитивно, победник на денот е Хамилтон благодарение на фантастичната стратегија и планот Б на Мерцедес, со кој Луис стигна до третиот триумф на четвртата трка во Ф1 шампионатот.

Валтери Ботас одново се задоволи со третото место денеска, четврт беше Леклер од Ферари, а во првите 10 се најдоа Перез, Рикиардо, Сајнц, Норис, Окон и Гасли.