Европскиот шампион е друга димензија: Одбојкарите загубија од Италија во осминафиналето во Бари

Македонската одбојкарска репрезентација претрпе пораз од Италија од 3-0 во осминафиналето на Европското првенство.

Уште пред натпреварот беше јасно дека „аѕурите“ како одбојкарска велесила и бранители на титулата се апсолутни фаворити на пресметката во Бари, а тоа го потврдија и на теренот.

Нашиот национален тим има добар прв сет во кој му парираше на домаќинот, поточно истиот заврши со 25-20. Во продолжението од дуелот Италијаните беа далеку подоминатни, го потврдија квалитетот и со 25-12, 25-15 обезбедија место во наредната фаза во која ги очекува дуел со подобриот од Холандија-Германија.

Со ова завршува приказната на избраниците на Миленкоски на овој континентален собир, ЕП на кое „спартанците“ испишаа историја и за прв пат го одведоа националниот состав во Топ 16, поточно меѓу најдобрите на стариот континент.

Љафтов со 10 и Ѓоргиев со 9 поени беа наши најдобри поединци во Бари.