Евролига: Црвена Звезда настрада во Минхен, Панатинаикос го преслуша очајниот Реал

Црвена Звезда има се повисоки стремежи во сезоната во која игра одлична кошарка во Евролигата, но во директната битка за петтото место на табелата, избраниците на Сферопулос вечерва потфрлија во Минхен.

Баерн му нанесе тежок пораз на српскиот шампион и успеа да слави во натпревар во кој постигна точно 100 поени, па на тој начин сега има една победа повеќе од шестопласираната Звезда.

Победата од 100:82 беше доведена во прашање само во првата четвртина во која Звезда беше за нијанса подобар тим, но во продолжение Баерн почна да го „меле“ противникот, до таа мера што имаше и 29 поени разлика во третата четвртина (77:48).

До крајот на мечот, домаќините малку се опуштија и дозволија Звезда да се избори за подостоен пораз, кој инаку е втор во низа во Евролигата.

Од одиграните натпревари вечерва, доста внимание привлече и репризата на минатогодишното финале меѓу Панатинаикос и Реал Мадрид, епизода во која одново подобар беше грчкиот великан.

Реал игра во очајна форма оваа сезона и веќе е надвор од местата кои обезбедуваат разигрување, па по неуспехот од 85:70 има ист биланс на победи и порази (14:14).