Елмас шокиран од случувањата на „Сан Сиро“: Вакво нешто никогаш немав видено!

Наполи дефинитивно има за што да жали по првиот четвртфинален дуел со Милан во Лигата на шампионите, бидејќи тимот на Лучијано Спалети не искористи ниту една од неколкуте зрели шанси кои ги имаше пред противничкиот гол.

Елиф Елмас и соиграчите го разбранија Мењон и францускиот голман имаше неверојатна партија, но покрај поразот од 1:0, лоша вест за Спалети и фановите на Наполи е тоа што тренерот на реваншот нема да може да смета на два клучни играчи.

Ангиса заработи црвен картон во 74-та минута поради втор жолт картон, додека стоперот Ким доби жолт картон и поради суспензија исто така ќе мора да паузира на реваншот на „Марадона“ стадионот.

Главен судија на натпреварот на „Сан Сиро“ беше Романецот Иштван Ковач, од кој крајно незадоволни беа речиси сите играчи на Наполи, меѓу кои и Елмас кој не го криел разочарувањето во разговорот со италијанските новинари.

– Навистина не знам што да кажам за судијата, тоа беше неверојатно. Тој свиреше се против нас, речиси сите добија опомени. Тие правеа фаули и не добиваа жолти картони, а ние постојано добивавме опомени. Вакво нешто никогаш немав видено, неверојатна ситуација на вака важен меч во Лигата на шампионите.

– И покрај се, јас верувам во полуфинале. Имаме силни играчи и силен тренер со цврст карактер. Спалети ќе знае што да прави на вакви натпревари. Да се насочиме на мечот кој го играме во Серија А, а потоа повторно ќе мислиме на Милан, – изјавил Елмас.