Ѕвезда на Ајакс: Салма Хајек се обиде да ме убеди да потпишам за Рен

Екипата на Ајакс секогаш имала млади и квалитетни играчи, играчи кои со своите партии се наметнуваат и прават трансфер во подобри, поголеми средини и првенства од Холандија.

Еден од поквалитетните играчи на клубот од Амстердам во овој момент е Едсон Алварез кој има 23 години и може да покрие повеќе позиции, да игра како централен дефанзивец или последен играч за врска. Тие негови изданија дефинитивно ќе му донесат трансфер во иднина, но во меѓувреме тој откри дека одбил да се пресели во Рен иако во тоа го убедувала неговата сонародничка, познатата холивудска актерка Салма Хајек.

Хајек како сопруга на сопственикот на Рен се впуштила во акција, меѓутоа и тоа не било доволно за Едсон да го напушти Амстердам.

-Беше многу тешко [да се одбие Рен], но на крајот немав никаков сомнеж. Сакам да играм во Лигата на шампионите, против многу големи тимови. И пред оваа сезона бев само вистински стартен играч шест месеци. Тоа е прекратко се се остави неизбришлива трага. Имам уште многу да докажам.

-Да, тоа е точно [Хајек се обиде да ми го смени мислењето]. Како позната сонародничка, таа ми се јави и се обиде да ме убеди да дојдам во Франција. Тоа ме изненади и ласкаше, но мојот избор за Ајакс беше сигурен и тоа и го објаснив. Таа е многу голема и позната актерка, огромна ѕвезда, поради нејзините холивудски филмови низ светот. Ја оценувам многу високо. Таа е пример затоа што како Мексиканка се бореше да стигне до каде што е денес, -рече Алварез за „Де Телеграф“.