Динамо брзо најде замена за Чачиќ: Поранешен играч на Ливерпул ќе му биде тренер на Ристовски

Срамниот пораз од Шибеник и елиминацијата во Купот го оставија Динамо без шанса да се бори за „двојната круна“ во Хрватска, но иако првично не беше објавено, клубот соопшти дека тоа е последниот натпрвар на Анте Чачиќ како тренер на првиот тим.

Искусниот стручњак добиваше доста критики изминативе месеци и беше посочен како главен виновник за неатрактивниот фудбал кој го игра Динамо, а по заминувањето на капитенот Аријан Адеми, брзо стигна и првата голема криза во Загреб.

Динамо денеска информираше дека Анте Чачиќ е веќе минато, но експресно пристигна и информацијата за неговиот наследник, кој сепак не е оној кој го најавуваа дел од медиумите.

Утринава се појавија шпекулации дека Динамо ќе биде воден од поранешниот тренер на Шкендија, Рој Ференчина, но оваа опција дефинитивно отпаднала и нов тренер на Стефан Ристовски и соиграчите ќе биде поранешен фудбалер на Ливерпул.

Станува збор за легенарниот Игор Бишчан, добро познато име во хрватскиот фудбал кој кариерата ја започна во Динамо, а последно работеше како селектор на У-21 селекцијата на Хрватска.

Бишчан требаше да го води младиот хрватски тим на Европското првенство ова лето, но наместо тоа, сега ја добива улогата на шеф на стручниот штаб во Динамо.