Димитријевиќ во одбрано друштво на играчи на кои треба да се внимава во Евролигата

Денеска започнува новата сезона во Евролигата, а активен во првиот ден ќе биде македонскиот репрезентативец Ненад Димитријевиќ кој со неговиот Олимпија Милано гостува кај амбициозниот Монако.

Таа средба е закажана за 19 часот, средба на која Нено се очекува да дебитира во елитното натпреварување, најквалитетната кошаркарска конкуренција на стариот континент.

Пред самиот старт на кампањата, специјализираниот сајт за кошарка „Eurohoops” објави Топ 5 листа на играчи на кои треба да се внимава во сезоната 2024/2025, пет играчи дебитанти, а меѓу нив е Димитријевиќ, но и уште еден македонски репрезентативец Ти-Џеј Шорс од Париз.

-Димитријевиќ пристигна во Олимпија Милано откако во 2023 и во 2024 година стигна до МВП признанија во ВТБ-лигата, еднаш во сезоната, еднаш во плејофот. Погодете што? Во првото официјално натпреварување за новиот тим – тој го освои МВП признанието во триумфот на Милано во Супер Купот на Италија. Каков начин да се започне новата приказна. Димитријевиќ веќе се наметнува како еден од лидерите на тимот на Милано и би можел да биде факторот што му недостигаше на овој клуб за конечно да се врати назад во плејофот, а зошто да не можеби и на фајналфор турнирот, -стои во објавата за Нено.

Освен Димитријевиќ и Шортс во најтесниот избор на „руки“ кошаркари на кои мора да им се посвети внимание се и Еван Фурние од Олимпијакос, Карлик Џонс од Партизан и Рејџон Такер од Виртус Болоња.