Димитријевиќ одново двоцифрен, Хувентуд го претрпе вториот сезонски пораз во Шпанија

Хувентуд го претрпе вториот пораз во шпанската Ендеса Лига на гостувањето во Тенерифе, откако не успеа да се справи со истоимениот тим во возбудливиот меч со кој беше затворена саботната програма.

Во пресметка во која на крајот одлучуваа нијанси, како поуспешни се покажаа домашните кошаркари, кои со минималниот триумф од 86:82 го задржаа максималниот учинок по пет одиграни меча и останаа на врвот на табелата во домашното првенство.

За разлика од Тенерифе, за тимот од Бадалона за кој настапува и нашиот Ненад Димитријевиќ ова беше втор пораз во шпанската елита, откако претходно загуби во дуелот со големиот Реал Мадрид.

Нашиот репрезентативец вечерва мина 20 минути на паркетот и беше еден од четворицата играчи на Хувентуд кои имаа двоцифрен учинок, завршувајќи го мечот со 10 постигнати поени.

Нено беше одличен во рекетот и имаше реализација 3 од 4, додека не му одеше од линијата зад три каде од четири обиди, погоди само еднаш. Покрај него, двоцифрени во Хувентуд беа Басас, Бродзиански и Томиќ кој воедно беше и најефикасен на паркетот со 18 поени.