Димитриевски има отворена врата за враќање на добро познато место, клучен фактор е Мамардашвили

Новата сезона во Ла Лига ќе почне за помалку од една недела, но во многу шпански клубови се уште има многу нејаснотии и околу тоа како ќе изгледаат конечните тимови.

Трансфер пазарот на Пиринеите ќе се затвори на почетокот на месец септември, а до тој момент сигурно ќе има промени во составите на сите шпански клубови, меѓу кои секако е и Валенсија.

Овој шпански клуб стана посебно интересен за македонската јавност поради трансферот кој го направи Столе Димитриевски на почетокот на летниот преоден рок, но дури и во ситуација кога нашиот најдобар чувар на мрежата дебитираше на „Месталја“, се уште непознато е дали неговиот престој во клубот ќе биде навистина долготраен.

Димитриевски пристигна во Валенсија со цел да биде прв голман на „лилјаците“, но клубот засега не го исполни првиот и главен услов за да се случи такво нешто, а тоа е продажба на Гиорги Мамардашвили.

Валенсија засега не дочека адекватна понуда за која би се откажала од услугите на грузискиот голман, а интересно тоа ќе ја одреди и судбината на Столе Димитриевски.

Македонскиот чувар на мрежата во договорот има клаузула според која би бил ослободен за симболична сума, па како што јавуваат медиумите во Шпанија, веќе му се отворила една врата за трансфер пред крајот на преодниот рок.

Добро упатените новинари информираат дека Рајо Валјекано размислува да му подаде рака на Димитриевски, односно веќе се распрашува за негова позајмица и враќање на „Валјекас“. Димитриевски пристигна во Валенсија како слободен агент, но пред да има таков статус, Столе беше незаменлив на голот на Рајо.

Малиот мадридски клуб со добри очи гледа на враќање на Димитриевски како позајмен фудбалер, но тоа ќе се случи само ако не се оствари првото и примарно сценарио. Валенсија посакува да го продаде Мамардашвили и да инкасира измеѓу 30 и 40 милиони евра, бидејќи така ќе го нормализира клупскиот буџет, но и ќе му остави простор за докажување на Столе кој беше прво летно засилување за „лилјаците“.