Дејвис со оценка за работата на Компани во Баерн: Секој тренинг е битка…

Венсан Компани помалку и неочекувано доби шанса да седне на кормилото на Баерн Минхен и тоа по една тешка сезона на германскиот великан кој остана без ниту една титула како на домашната така и на меѓународната сцена.

Се споменуваа повеќе фудбалски стратези како наследници на Томас Тухел, за некои се говореше и дека е завршена работата и доаѓаат во Минхен за да на крајот Компани ја добие довербата и тоа по кампањата во која со Барнли испадна од Премиер лигата.

Многу прашања, коментари и реакции имаше за неговото назначување пред се во поглед на искуството и фактот што е релативно на почетокот на тренерската кариера, но засега Белгиецот добро работи, функционира и она што е најважно ја држи соблекувалната под контрола и играчите се задоволни.

-Тој е многу брилијантен човек. Начинот на кој играме сега е многу интензивен. Тој го избира најдобриот тим и најдобрите играчи за да ги стави во тимот што добро тренира. Секој тренинг е битка за стартното место. Ништо не е загарантирано. Начинот на кој зборува со тимот, тој е љубезен, но цврст. Тој има идеи и ние добро ги извршуваме, -вели бекот Алфонсо Дејвис.