Де Роси имаше емотивна вечер, па соопшти: Наинголан се враќа во италијанскиот фудбал

Италијанската Серија Б оваа сезона е побогата за многу звучни имиња во фудбалот, не само на теренот, туку и на клупата каде има доста познати лица.

Вчерашниот натпревар меѓу Калјари и СПАЛ донесе средба на двајца добри познаници, односно Клаудио Раниери и Даниеле Де Роси. Раниери во 2019-та година беше сведок на последниот натпревар кој го одигра Де Роси за Рома, а вчера го пречека како домаќин во Сардинија и имаше навистина емотивна прегратка меѓу двајцата.

На крајот, учителот го победи ученикот и Калјари славеше со резултат 2:1, но по средбата, Де Роси го привлече вниманието и со изјавата која ја даде за големото зимско засилување кое ќе го добие во својот СПАЛ.

– Ова беше навистина многу емотивна ноќ за мене. Фудбалот ми носи емоции кои ме прават жив. Го прегрнав тренерот Клаудио и не сакав да го пуштам.

– Добра вест е што го видов и Наинголан. Веќе подолго време мислев на Раџа и ќе зборуваме за него откако ќе го одработи првиот тренинг со нас во понеделник. Тој се враќа во италијанскиот фудбал, но ќе видиме во каква форма е во моментов. Мислам дека ќе треба некое време за да се врати во нормала, – изјави Де Роси.

Ranieri & De Rossi 🫂❤️
Non ce la facciamo, troppi ricordi 😭#CagliariSpal #SerieBKT #DAZN pic.twitter.com/8wlRX275rr

— DAZN Italia (@DAZN_IT) January 27, 2023