Де Јонг: Нема разлика во талентот меѓу Барселона и Баерн, разликата е во нешто друго

Френки Де Јонг е еден од ретките играчи на Барселона кои излегоа со изјава по засрамувачкиот потоп во Лисабон, па иако само една година е на „Камп Ноу“, Холанѓанецот ја повтори тезата на Жерард Пике и нагласи дека се потребни големи промени во клубот.

Надежниот играч за врска се претопи во сивилото на Барселона и едноставно беше непрепознатлив на теренот во ситуација кога играчите на Баерн Минхен доминираа во секој поглед, а иако до овој меч многумина се обидуваа да ги занемарат вистинските проблеми во тимот и клубот, веќе нема простор за такво нешто.

– Мислам дека овојпат се докажа дека имаме големи проблеми како тим. Знаеме дека се потребни големи промени и веќе тоа не треба да се крие. Нависитна е многу тешко, мора да побараме прошка од навивачите, – започна Де Јонг и додаде.

– Искрено, во првите 20 минути мислевме дека можеме да победиме. Тие дадоа ран гол, ние одговоривме и имавме две добри шанси.

– Сепак, тие беа многу подобри од нас. Нема разлика во талентот меѓу Барса и Баерн, се работи за интензитет во играта и напорна работа како колектив. Мора да ги промениме овие работи, разочарувањето е огромно, не само за мене, туку за целиот клуб, – заврши Де Јонг.