Будимир херој на „Максимир“, Хрватска се пласираше на ЕП (Видео)

Хрватската фудбалска репрезентација требаше да оствари било каква победа над Ерменија за да не зависи од резултатот на натперварот меѓу Велс и Турција, па иако не беше лесно, „коцкестите“ успеаја во намерата и се пласираа на Европско првенство.

Пред почетокот на ноемврискиот квалификациски прозорец, Хрватска чекаше една услуга и истата ја доби од Ерменија која во претходната рунда ремизираше со Велс 1:1, а вечерва со победа над истата селекција беше обезбеден билетот за уште еден голем турнир.

Тимот на Златко Далиќ доминираше во секој фудбалски аспект и заслужено оствари победа, иако при резултат 0:0 и гостите се заканија и ја заледија крвта кај фудбалските фанови на „Максимир“.

Големо олеснување дојде пред крајот на првиот дел кога долгата акција заврши со центаршут на Соса и гол на Будимир, по што напаѓачот на Осасуна се претвори во херој за хрватската селекција.

Резултатот не се менуваше до крајот и овој гол се покажа како клучен за нова голема победа, која ги носи Лука Модриќ и компанија на континенталниот собир во Германија.

Велс долго водеше над Турција и беше во игра за Европско првенство, но на крајот мечот заврши 1:1 и Турција е таа која како првопласирана во групата ќе игра на главниот турнир.