Блатер: Го загубивме фудбалот, го продадовме…

Некогашниот прв човек на Светската фудбалска федерација (ФИФА), Сеп Блатер не е среќен и задоволен од правецот во кој се движи најпопуларниот спорт на планетава.

Контроверзниот Блатер долго време беше прв човек на ФИФА, време во кое се случуваа позитивни и негативни работи, но според него сега фудбалот е продаден во Саудиска Арабија.

-Да, го загубивме фудбалот од Саудиска Арабија. Им го понудивме, а тие ни го одзедоа, -вели Блатер за РТЛ.

-Изненадувачки е што нема опозиција во организацијата. Во мое време, проблемите се дискутираа на конгреси, а одлуките се донесуваа на конгреси. Денес, нема дискусии на конгреси. Воопшто нема потреба да се одржуваат конгреси и да се покануваат луѓе, сè се прави електронски и никој ништо не кажува, -дополнува Швајцарецот кој нема добро мислење за Светското клупско првенство.

-Има премногу фудбал, секогаш истите клубови, истите играчи, кои треба да одмараат. Играа на екстремна жештина, тоа воопшто не е здраво. Не можете да им го правите тоа, мора да се грижите за здравјето на играчите, -подвлече Сеп.